La noticia á hechu sensación enos pedióricus dela Comunidá: la Asociación para la Siberia, Serena y Vegas Altas (ASISEVA) revendica la criación duna tercera provincia qu’albarqui las tres comarcas orentalis. Enque ai quien á queríu vél nesti assuntu la pantasma dela endependencia catalana, nós hallamus que simplimenti es una preva más del apuramientu del moelu territorial español.

Las provincias de Caçris i Badajó son las más ampias d’España. Alo contrariu delo que se piensa mucha genti, las provincias son costrucionis artificialis sin relación denguna cona coltura tradicional o la palra: son frutu duna rehorma lustrá del siegru XIX pa recinchal l’Estau astilu francés. N’aquellus entoncis, Estremaúra ya era una tierra emprobecía por mé delas desmorticionis liberalis, qu’arramplarun conas hesas boyalis i los montis del común, i qu’imprantarun el cortiju d’únicu sistema produtivu. Los campusus s’envirtierun en siervus dun señoritu quasi siempri folasteru i la Modernidá s’assentó n’Estremaúra dela peol manera, pos esta sitación económica hue la causa dela hambri, el conflitu social i la emigración estremeña delos tiempus últimus.

No es que los de Talarruvias o Herrera s’aigan güeltu endependentistas, es que la continación d’esti moelu colonial no da pa más. Las nesseciais socialis i las trashormacionis económicas i colturalis que tra’l siegru XXI no casan con un inseñu territorial d’ai 200 añus qu’está hechu pa dessangral los puebrus. Güenu está, peru… la solución es crial más provincias? Musotrus pensamus qu’esti no puei sel un arregliju enfenitivu, peru quiciá poía sel un primel passu p’amejorá-l repartimientu dela riqueza i l’amenistración.

Estremaúra es una tierra grandi i mal comunicá por causa duna halta d’esplotación púbrica i abandoná de parti del Estau. Sabemus que es huerti izil estu, peru no poemus siguil dessimulandu i incultandu la verdá: la muestra tierra precisa una rehorma política i económica, precisamus:

· Comunicacionis: una redi de carreteras i vías de tren que ponga faci la movición interna, l’enganchi conas capitalis d’España i Portugal que premita la salía i entrá de mercaerías pa favorecel la pula económica.

· Esplotación púbrica (1): Estremaúra mereci más recussus i más atendimientu del Estau central, musotrus tamién nessecitamus un dineru que namás s’espeta pa Cataluña, el País Vascu i Madril; i precisamus que las impresas assitiás n’Estremaúra quein los albitrius (2) aquí.

· Acomarcamientu (3): la Comunidá tien destensión bastanti i cidais mu desapartás entri ellas i ellas, es mestel una rehorma territorial qu’arreparta’l país en comarcas i mancomunidais reforçás, i que soponga las provincias i las deputacionis. La comarca es la fegura territorial natural i tradicional, devin de definil-si legalmenti i acebil competencias pal goviernu delos assuntus localis. El monecipiu tamién devi de dal passu al conceju: los puebrus án de poel sel más assolutus pa tenel más decisión enos assuntus cutianus.

(1) Inversión pública.
(2) Impuestos.
(3) Comarcalización.

Huenti dela retrataúra prencipal: Mery Camacho, Pinterest