El 20 hebreru del 2022, los calabaçonis i los seronis ain votau a tentu d’ajuntal los sus monecipius nunu solu. Veramenti, esti es un hitu sin antecedentis ena estoria moerna d’Estremaúra i del Estau: no tenemus enteracionis de más localidais con tantus abitantis en que s’ayi promovíu un proyeutu messejanti, cosa que dis abondu dela emportancia d’esti processu apregonau delos dos alcaldis que ya se barruntava dendi hazi tiempu á.

Entovia sin nombri nuevu ni símbolus comunis, Don Benitu-Villanueva sedrá la tercel ciá del país tras de Badajó i Caçris, con unas lindis monecipalis de grandol aparenti, con servicius púbricus de referencia palos puebrus d’arreol i con una espigaera endustrial más grandi que la d’otras capitalis más mayoris i munchu más antigas.

Enque aiga variança de pareceris a tentu del’unión, las campañas delos partíus políticus ain agurau pal sí dendi lo primeru i aquesti es el resultau que por fin á salíu delas votacionis: con un 43’3% delos dombenitensis i un 58’9% delos villanovensis qu’ain acuíu alas urnias, la juntança dambus a dos puebrus es un hechu. Según las informacionis oficialis, un 66’2% delos votantis calabaçonis ain acorpau’l proyeutu, lo mesmu qu’el 90’4% delos seronis.

La suma d’abitantis delas dos localidais sedrá d’arreol de 63.112 pressonas: 37.275 de Don Benitu i 25.837 de Villanueva dela Serena, entovia largu delos de Badajó (150.610) i los de Caçris (95.418), peru porcima delos que tien Méria (59.424). Los más remissus cona unión son angunus paisanus de Don Benitu, por sel esta la localidá más puebrá i más ampia, i en hallandu los vezinus della qu’esti processu puea trael una muación pa una dentiá local de sempri huerti nel país.

La juntura es una novidá pa esta parti dela que mientan España vaziá, pos da esperanças de creceera a un salienti estremeñu qu’andava asprés duna capital propia. Assitiá entri las Vegas Altas i la Serena, Don Benitu-Villanueva assentará nel ríu una colá aspeci de prátanu azuli arreol de Guadiana, que sedrá’l coraçón conómicu d’Estremaúra junta Badajó i Méria. Estu velaquí poía terminal dandu sentíu a aquel proyeutu d’ASISEVA que proponía la criación duna tercel provincia orental.

Don Benitu-Villanueva s’envertirá de sópitu nel segundu monecipiu col Produtu Interiol Brutu más altu, namás detrás de Badajó. Sedrá mesmamenti una delas capitalis col setol primariu más desenroau. Esta velaquí es una delas fortalezas dela ciá de salienti: la mesturança del caraiti roal i urbanu qu’ain perdíu las otras capitalis por queal endedicás alos servicius.

De tolas maneras, lo qu’está polo cralu es qu’el chocazu giopulíticu qu’á d’acarreal l’unión no es meninu, pos quea la capital dela Comunidá de quarta ciá, en pranteandu una muación delas muestras relacionis entrurbanas.

Ascucha l’audiu l’artícalu acalcandu ena barra d’embaxu.