Dixu’l filosofu crássicu Esquilu d’Eleusi que la primel vítima dela guerra es la verdá. Col títari qu’ai entangau enti Russia i Ucraña assestimus a una desbandá de propaganda dendi los meyus cona fin de canteá’l pensamientu delas gentis pal lau que más enteressi, comu aconteci con tantas custionis d’atrecendencia mundial. Dendi aquesti espaciu ena redi pala comunidá estremeñupalranti, i p’arrehuíl d’esti tracamundeu praneau, velaquí brindamus unas apontacionis desapartás lo mesmu del discurril oficial que dela dessidencia barajá.

En pesal deque las agencias de noticias suelgan de presental la guerra comu una lucha entri la cevilización dacá i la barbarii dallá, las mayoranças políticas i conómicas d’Ocidenti i de Russia se hazin casu delos mesmus amus. Ena moernura tardía ya no ain paísis soberanus ni imperius auténticamenti desseparaus, pos tolas grandis impresas i tolos estaus andan aconchavaus entri ellus i ellus nuna redi de poel governá dunas pocas de familias. Hallamu-nus alantri dun teatru con pressonagis que hazin de mandonis güenus i malus, peru con vítimas veras i millonis de vidas jalaçás por causa dun proyeutu andi la puebración semus menus que peonis.

– Con tó i con essu, i al revés delo qu’anvitan a pensal las canalis de massas, la violencia no espiençó a primerus del añu 2022, que hue nel 2014, quandu l’Estau ucrañanu escomençó a atacal los endependientistas russerus del salienti’l país en meyu los protestus polas conviersas pal entraeru ena UE. El conflitu enti Russia i Ucraña dimana delos pareceris afrentaus qu’ain endrentu dela sociedá, entri los cidadanus canteaus pa Uropa i la coltura ocidental pa un lau i los que se miran más ena erencia russa pal otru. Inque dámbalas dos comunidais vivieran en pas dendi la endependencia d’Ucraña nel 1991, el chocazu entri Ocidenti i Russia apreparó la devisión en dos bandus i el rompimientu’l país por mé de dos proyeutus giopulíticus contrarius que los poeris aprovechan pa prendel los motoris del negociu la guerra.

– Comu ena Primel Guerra Mundial i la Segunda, la d’agora no es otra cosa qu’un estrumentu pa mual la estrutura la conomía i las relacionis entrenacionalis. L’ataqui russu es la resultancia giopulítica del movimientu dela OTAN pa Ucraña, cosa que caldeó las relacionis entri las castas dun estau que retién ucrañanus i russus, peru tamién otras comu son los moldavus, gagauzus, russinus, rumanus, úngarus i más. Lo que vémus oi a Russia i Ucraña es la continación delo que bichémus a Yuguslavia enos añus 90, quandu la OTAN calavoró cona devisión d’esti país en bombeandu una Serbia amistá con Russia. No devi d’olvial-si que la OTAN es una associación melital nacía p’afrental-si a Russia.

– Los hechus d’uguañu son tocantis conos pranis del Imperiu ingrés moernu, una junta de paísis i associacionis entrenacionalis ereeras del antigu imperiu británicu —Reinu Uníu, los Estaus Uníus, Canadá, la OTAN i estitucionis bancarias, colturalis i d’inginiería social—, que junta los estaus uropeus envasallaus ahorman el migollu delo que conocemus comu Ocidenti. L’enceviqui d’esti polu giopulíticu hue de sempri’l desseparal los caminus duna Alemaña alantá eno tecnológicu i una Russia rica de recussus naturalis ya dendi antis dela Segunda Guerra Mundial, en acovijandu tolos ententus d’acercamientu delos dos estaus por mé del conchaveu conas sus deligencias. No s’estraña por ellu qu’a Berlín i Brusselas repuntein los habraerus pa entangal un exércitu uropeu desseparau dela OTAN, ni susprendin los declaramientus d’aquel cargu melital que piía respetu pa Russia enantis dela guerra esmençal.

– La caía de Russia no es una possibiliá, es una cosa que ya aconteció nel 1991, fecha que marcó l’escomiençu del escachi’l mundu eslavu encarnau del Imperiu russu i l’Unión Soviética. La reconquista d’Ucraña poía partil esti país en dos o más cachus, peru tamién hazi de cuajal l’unidá política dela esposición contra’l Kremlin i acreci las ansias d’endependencia en munchas regionis del grandi estau urasiáticu. I n’Ocidenti essu es consabíu.

– Assín i tou, la resultancia d’aquesta crisi tamién acarrea una perda de poel pal mentau Imperiu ingrés moernu: aspués del Brexit, la enfrujencia’l Reinu Uníu no dexa d’amenuíl n’Uropa. Lo mesmu aconteci alos Estaus Uníus: la repúbrica l’otru lau l’Atlánticu se halla nuna fasi de retraimientu, entri que las podencias asiáticas comu China, la India o Arabia Saudina —i la mesma Russia— amenaçan con abandoná’l comerciu en dólaris i adotal otras devisas. Estu velaquí aprepararía un guarrazu palas financias ocidentalis, que s’añediría ala froxera melital i territorial delos ereerus dela Commonwealth.

– Junta la rutina delas macogranjas, las vacas locas i la gripi’l pollu —alarmas engañosas p’amenuíl la produción d’alimentus o derechamenti pa jalaçá-lus—, el parón delas conomías russa i ucrañana tamién está derigíu a aprepará’l desabastu general, ya qu’estus paísis eslavus son dos delos produtoris prencipalis de granu a nivel mundial. Amás, Russia es una delas huentis más emportantis de gas i arrancha los paísis del centru i el salienti d’Uropa. Cona guerra i las sancionis ocidentalis, la escasseá está por segura en meyu d’estus juegus dela hambri que lleva apreparandu la mayorança mundial dendi l’esmençón del andanciu.