El Cantón Estremeñu

La vitoria de Trump pa presiénti delos Estaus Uníus á aballau con una ristri porfías políticas que paici que ya esmiençan a marcal una muación d’epoca. En pocus añus, el millonariu tien síu escapás enhiestal-si de representanti dun canteu idiológicu entrenacional pa posturas conservantis i de derecha que no se vía alo menus dendi primerus del siegru XX, acompañau duna recholá de partíus i candilatus nuevus a Uropa i Sulamérica.

Lo que no s’asperava que la su conseña más anombrá huessi un decraramientu derechu d’entencionis, pois el candilatu ganaol delas delecionis no s’á aguardau a agarral l’assientu pa queal desmentau a meyu mundu col su proyeutu: integral Canadá i Gronlandia enos Estaus Uníus i acrecel la enfruéncia d’esti país ena Canal de Panamá.

Sin tenel por ciertu entavía si sonin bocanás o propuestas veras, las racionis dendi los paísis polaris allegarun de momentu: «Canadá es un estau endependienti i Gronlandia no se vendi», izían alo primeru… peru llama l’atención la demessión del primel menistru canadanu Justin Trudeau justamenti agora, dispués de vel resestíu nel cargu enos tiempus peoris l’andanciu. El goviernu danés ya confirmó la su disposición pa negocial, mentris qu’angunas inqüestas asseñalan el sostribu delos gronlandesis en favol l’ajuntamientu. Polo cralu que p’aquellus andurrialis se sabi más de que se cuenta.

L’acuerdu duna América del Norti unía no es nuevu, que ya lo sacarun tiempu á angunas corrupelas de hinchoneu comu la Junta de Roma nel marcu dun pran de repartimientu’l mundu en boclis continentalis. Col arrebulliéru de Russia i la pula de poencias comu China, la India i otras; l’ordin veniéru precisa dun enregionamientu’l mundu hormi ala ventura d’uguañu: ya no es possibli la governancia entrenacional sola delos Estaus Uníus qu’apreparó la caía l’Unión Soviética, i nel país delas listas i las estrellas ellu es consabíu. No seamus ducis, estu vien de más parriba.

El ti Sam s’acató deque ya no puei siguil hiziendu l’oficiu de polecía’l mundu: la globalización está mu cara, conqu’ai de ponel-si huerti en casa. Los tiempus están muandu, qu’izía aquel.

Huenti’l santu prencipal: elfinanciero.com