Uguañu es corrienti de poné’l provechu conómicu i las muacionis tecnológicas porcima de tolas cosas, es lo que llamamus la idiología del pogressu. Esta postura coltural, basi del pensamientu uropeu delos siegrus caberus, tien síu una delas ideas huertis dela epoca en que vivimus. Dendi la Conquista d’América i la colonización del mundu -i conas revolucionis liberalis, facistas i socialistas-, la Modernura s’assienta d’edá crássica del muestru tiempu.

Por tiempu bastanti, el conceutu’l pogressu tien guiau la creceera delas cidais i metrópolis por tol mundu, la esparramancia delos valoris liberalis, l’apartu dela naturaleza, la sobreprodución endustrial, la perda delas colturas tradicionalis i una conomía secostrá delos Estaus i sostribá ena moneda. Añus i añus d’esti sistema mos tienin dau a munchus más añus de vida, quartus de bañu i papel del culu… peru a trocu dellu tenemus perdía la cenzillés, no sabemus lavoral comu la genti de patrás ni avalel-mus al monti, amus apreparau desequilibrus gravis ena naturaleza, tenemus condenaus millonis ala probitú i la hambri, i la huerça delas almas vivin barajás dunus pocus de desalmaus. L’amol al dineru es tan grandi que hondeó con tolo más.

Dendi l’estremeñeríu mordajustu, liberal o social-demócrata, se palra dela emportancia de tenel güenas comunicacionis i sel escapás de competir con economías más huertis… no semus intolerantis de tó cona postura esta porque paici la más lógica, peru… acasu mos tenemus pensau seriamenti lo que ganamus con ellu?

Amus a habral cona verdá: Estremaúra es la güerta d’Uropa i el sinu palas vacancias delas capas meyas delas cidais españolas i -de ca ves más- uropeas. Nel engranagi’l capitalismu mundial, i mesmu nel muestru Estau, semus ciadanus de segunda o tercel categoría: un territoriu endedicau ala produción de materias primas i energía palas capitalis d’ahuera. Estu velaquí no vai a mual por tenel más trén o más aropuertus, namás valdría p’acomodal i agraval la sitación de soyugamientu en que vevimus.

Que la muestra tierra es una colonia ya lo dúan pocus estremeñus. I es qu’al puebru estremeñu la globalización, más que ganancias, mos truxu más emigración, los ucalitus, el calamoti de Guadiana, la seca delas anzinas, l’encarecimientu delos precius, el fechi delos comercius chicus i la ruína del’agricoltura i la ganaería… peru a trocu ensiquiera mos premitió de desenroal la endustria, ni de conselval la muestra coltura, ni de mantenel la puebración ni de sel referencia n’aspeutu dengunu a nivel altu. No senefica essu que l’abrición delas fronteras no mos hizu tantu bien comu mos gusta de pensal?

No sedrá que mos tienin engañaus i que semus los perdeoris dela globalización? Pontoci… paqué tantu tren? Paqué tantu turismu quandu’l puebru no tien tierras ni Estremaúra tien un tecíu produtivu espigau? En momentus de precisa comu esti lo arreparamus. El foturu imediatu paici que tira más pal acotamientu i los fechis de frontera que no pal’abrición delas sociedais o la espigaera dun solu polu giopolíticu.

L’andanciu del corona-viru es la calma enantis dela tormenta. Las enteracionis que mos tienin dás a tentu dela infeción paici que son incompretas, en piyendu recada munchus científicus por no sabel-si entavía ni la huenti ni l’antigüedá dela malura.

Seya comu hueri, la campaña entrenacional de segureza arreol del viru aprepara una trashormación dela conomía mundial en que la soberanía vai a tenel una emportancia munchu más grandi que no daquí patrás. Las quarentenas s’usan tamién p’arrejuntal poel i pala piara no desmandal-si.

La globalización ya no da pa más, i la conomía global vá a dal passu a mercaus continentalis más huertis i más baqueus entrenacionalis. Los luchis pola soberanía i las riñas de poel entri goviernus mundialis, estatalis i regionalis sedrán corrientis. Devemus de tenel calma, sí, peru tamién devemus de comprendel que las cosas ya no vain a sel comu eran. Tenemus de lucheal polo muestru.