Estremaúra i Asturias son dos puebrus qu’esprimentan un acordal tardíu dela su concencia coltural si l’acomparamus con otras zonas del Estau comu Cataluña, Galicia o el País Vascu; peru cuyamenti á queríu el sinu que l’Estau español i l’Igresia católica descogieran el mesmu día pa celebral dambas tierras.

L’ochu de setiembri es una fecha que hazi onol ala Virgi de Gualupi nel casu muestru, i ala Virgi de Covadonga nel casu asturianu; peru dámbulus dos celebramientus salierun palantri por una decisión pulítica. Uguañu, angunus estremeñerus revendican el venticincu de marçu de día d’Estremaúra —fecha en que s’alevantarun los campusinus contra los señoritus nel 36—, mentris qu’otrus tantus asturianerus reclaman el venticincu de mayu -del 1808, quandi la Junta General d’Asturias se declaró soberana i se rebelló contra las tropas de Napoleón-. Mesmu nel día del mes concedimus estus dos puebrus…

No sacamus esta custión ala descudia, pos la fortuna paici que güelvi a ajuntal otra ves los dos cabus del reinu leonés, oi qu’ai tantu que se dessepararun. Asturias i Estremaúra corrin agora comu antañu un caminu uníu dela Vía dela Prata, i aquesti no es otru que’l recobramientu dela escoltura tradicional por mé dela luenga.

Esti cenderu estóricu contra la semilación castellana vien de siempri, peru hue enos añus 70 del siegru passau quandu los asturianus esmençarun a rebullil-si más seriamenti pola idioma. Dendi aquellas fechas, con subías i baxás, no án parau d’aparecel bandus de tolas crassis en defensa l’asturianu comu Conceyu Bable (añus 70), Xunta pola Defensa de la Llingua Asturiana (añus 80), Iniciativa pol Asturianu (2011) i sotrus hatus aparentis. Nel 1998, la Xunta Xeneral del Principáu d’Asturies aprovó la llamá Ley de uso y promoción del bable/asturiano, qu’obriga l’Estau a brindal alos falantis atendimientu ena luenga dellus.

La llingua asturiana es ermana de sangri del estremeñu, pos dambas sonin varianças estroncás del astul-leonés mediaval. Entri una i sotra luenga, las simejanças fonéticas, morfossintáticas, ortográficas i de vocabulariu son incuentablis, comu despriquémus nel endilgu de Los soníus del estremeñu.

Los logrus pal estremeñu son más modestus que los del ermanu del norti, peru assín i tó las revendicacionis pola idioma ahilan i ajuntan a ca ves más genti enas cidais i puebrus. Oi son munchus los concejus que s’arrochan a retulal castúamenti, i las ativiais i chalras alreol dela luenga son ya corrientis n’abondas localidais. Cuentamus con una norma escrita que vai cogiendu huerça entri los palrantis i deprendientis, que se gasta n’estampas, letrerus, páginas-web, telivisión i prensa. El passu siguienti, no puei sel otru que la reconocencia oficial i l’aprendimientu enas escuelas.

Santu prencipal: Cogiendo moras, d’Eugenio Hermoso